غنّيلي ماما مريم
غنّيلي خوّفي الخوف اللي بإيديّي
غنّيلي طيّري هالغيوم من عينيّي،
غنّيلي حلم غمرة دَفى بهالليل الطويل
غنّيلي لمسة غَفى تزهّر النَّعس البخيل،
غنّيلي العافية اللي إلها طريق رجوع
حتى لو الجسد آكلو المرض موجوع،
غنّيلي وطن ولادو بصحونهم ما في جوع
حتى لو الوطن حكّامو لجهنّم باعونا مَشروع،
غنّيلي ماما مريم متل ما غنّيتي ليسوع
حتى عالجلجلة قدّس صليبُه بخشوع،
غنّيلي روّضي اللي عم يخبّط بين الضلوع
هالقلب علّميه يكون دايماً بحالة خُشوع،
غنّيلي صوتك كلامُه بروحي مَسموع
حتى لمّا بيني وبينك الدرب مقطوع،
غنّيلي الليلة عشيّة وكلّ إيام الأسبوع
ذكّريني إنّو معك السما حقّها مدفوع،
غنّيلي بحروفك إتعلّم سبّح متل الطيور،
غنّيلي بصوتك عم إتنشّق ريحة البخور،
غنّيلي بعد شويّ، رح أوصل معك للنور.
ربيعة طوق
No comments:
Post a Comment