مشيوا، ندهلون هاك الصوت،
مشيوا، مرافقهم ملاك الموت،
شلحوا ضحكاتهون،
تَركولنا الوان صواتهون،
علّقوهون عا شبابيك القلب
مفتوحة عم تعوي فيها الريح..
أخذوا معهم مفاتيح البيوت،
ما عاد فينا بغيابهم عليها نفوت،
صرنا الخيطان العم تغزل جروح،
حتى الشمس من بعدهم ضوّها مجروح،
من كتر البِكي قناطر الضيعة صوتها مبحوح،
يا مين يوصّلنا عا حلم لعندهم بيعرف يروح،
بالغفوة نلمس وجوههم ولنّو نلمحون تلاميح..
حبّهم يا رب، حبّهم وبنورك اغمرهم منيح،
مشيوا والعمر فينا ماشي والأفكار مراجيح،
مشيوا وبين الأرض والسما عمّروا تسابيح،
هنّي اللي كانوا عالأرض أهلنا وأهل المسيح.
ربيعة طوق
No comments:
Post a Comment