طازة الخبز يا بيّاع؟
رغيف الجوع فزّاع!
وطازة دقات قلب بَيّ ملهوف،
عا باب الرزق واقف مشقوف!
جوع الرغيف بمعدة الفقير،
أصغر بكتير من جوع الحاكم لجيبة الفقير.
طازة سعر الخبز بوطنّنا اليوم عم ينباع
وطازة رغيف الجوع، عينيه كتير وساع!
لكن عتيق الشرّ اللي مْسَتْوِي الرغيف،
عم يوقد البشر بنار الجوع عالخفيف،
يتلذّذ بتعذيب أهل ما عندهم دِفاع،
قدام صرخة طفل ما في عليها شجاع!
وطمّاع الجوع والتاجر أكتر مِنّو طمّاع؛
غول عم ياكل ناس المدن وأهل الضياع،
مفلَّت عليهون تجّار الهياكل متل الضباع:
فتاوى عالسافرة وعالمطلقة منها أنواع،
لكن بحقّ الفقر ما في ولا فَتْوَى بالإجماع!
طازة همومك يا بلدي ويا حاكم سماع:
مجبول بالطَّمع وجيابك كتير بتساع،
جوع الخبز بينقات، لكن جوع الطمّاع
ما إلو شَبَع مع ضمير ميِّت وحِسّ مِنباع،
قبل ما الدود يعمل وليمة بين الضلاع!
يمكن عدالة الأرض تعطيك حجّة الدفاع،
لكن محكمة السما حكّامها ضحاياك الجِياع.
جوع الرغيف بمعدة الفقير،
أصغر بكتير من جوع الحاكم لجيبة الفقير.
