يا عيدي يا أجمل عطيّة

عمري صرت يا عمر غَمرة،

وبعيّدك ذكرى بالسنة مرّة؛

إلك هدية وشريطة حَمرا،

وغنيّة وباقة ورد وسَهرة..

سنة ورا سنة والعين خضرا،

ربّي إلك الشكر بدون حَسرة،

حياتي اليوم عشرة على عشرة.

ربيعة طوق 

٢٠٢٣/١٢/٥ 

بِكَفّي الريح.. وبيكفّي

صرلي عمر ناطر والدنيي حَفا

عم فَتِّش عا إيد تفتِّش عَليّي!

عم إنده وجوه، الريح مِنّي قَطَفا،

والشتي مرايات مكسورة بالمَيّي،

وإيدين الرحمة ما حدا شايِفا!..

والعمر هربان بالدني كأنّو خبريّة،

حتى الكَتَبْها ما بدّو حدا يَعرِفا!.

إيام تتمرجح بين صيفيّة وشتويّة

والوقت لَمْلَم حرامات الدفا،

وينُن يا دنيي أصابيع إيديّي؟!؟

طار الحلم وِبْكَفّ إيدي نام الغَفا،

والنوم صابيع البرد تكحَّل عَينيّي…

صَرِّخ يا ريح؛ إيام البُعد والجَفا

حتى الإيد بتترك إيدها بالفّيِّة….

ربيعة طوق 

بابا عم ناديلك

كنت مسنودة بشجر عينيك،

والأخضر عرس الفرح بإيديك،

بابا وشو اشتقت ناديلك! 

تِسمعني، اخباري إحكيلك..

وشو حلوة يا هالكلمة بابا يا بابا؛

أنا البنت اللي كنت إنت كلّ اصحابا،

بغيابك ما عاد في بيوت تحملني عتابا.. 

وين أنا وإنت وين!؟!

صرت الدمع بالعين..

شو بخاف كلّ ما بوابي يهزّا الريح،

والشوق ياخذني عالبكي مراجيح..

برجع بتذكّر إنّك هلّق مع المسيح،

بصلّيلك، وبرجع بفوت عقلبك بستريح.

ربيعة طوق

 

إلى عطر دم مالك وهيثم

بشري صرتي الحزن الما بيتعزّا!!

إبليس من دم رجالك مبارح تغدّى،

وبيعرف منيح مملكة السما إنتي خدّا،

وبيعرف عالأرض فرسان السما حَدّا.

لكن صابيع الشرّ كتيرة ما قْدِرْنا نْعِدّا،

نحنا اللي صابيعنا بالمسبحة بتتهدّا.

مَندورة عيالنا، ارزاقنا وأرضنا لأمنا العذرا، 

هيّي اللي شهدت دم إبنها عالصليب مْنَدّا،

وغير الصلاة والقداسة ببيوتنا وصّتنا ما بدّا.

وشو صعب للعدى ما نوقف ونتصدّى!

والراحوا راحوا اغتيال، مش موت عالهدى! 

يا غَدرة الما حدا قدَّرلها توقيت موعدا!

يا ما صلّينا إيد الشر الله عَنّا يِبعِّدا،

وفي يوم حساب مع رب الكون ونحنا قَدّا؛

مسيحنا اللي بشّر بالغفران بحقّ العِدا،

وقرنة السودا صفحات تاريخنا بِتْشَهِّدا:

سطور محفورة عالريح صوت الريح بيردِّدا،

لا خوف ولا قتل ولا الموت حتى بيهدِّدا!!

وأرز الرب هالشامخ بدم أبطاله صار مَسجِدا،

دعسات جدودنا داير جرودنا مزنّرة تحَدِّدا،

قَدَرْنا نشهد بالدم لدم المسيح يجسِّدا،

واليوم زادت السما قداديس يا ربّي مَجِدا.

ربيعة طوق 

أسجد لآلامك يا ملكي

أنا يا رب، ما إلي عين قلّك مع آلامك. بخجل إشركك بأوجاعي، إنت اللي جيت 
لحتى تنشلنا من ضياع وجع هالأرض. 

أنا يا يسوعي بستحي لما كتير إنوجع، وإغلط وقلّك: مع آلامك يا يسوع، لأنّو آلام 
الإنسان متل هالدنيي، دنيّة، ماإلها علاقة بآلامك السماوية. بخجل منّك يا رب لأنّو 
نحنا البشر آلامنا مربوطة بهالنفس الملهيّة بأمور الأرضيّات: كلسات خواتم برادي 
دواليب تلفزيون إنترنيت تلفون كبايات وقناني وكتير كتير من الأنانيّة، وإنت بكل 
لحظة عم تدفع حقّ أرواحنا من دمّك الربّاني بجسدك الإنساني! شو هالحب 

المعجزة اللي مستحيل نقدر نفهموا، نحنا اللي لابسين تياب الحياة ومشاغلها… 

كيف بدّي إشرك أوجاعي بأوجاعك اللي كانت ثمن حياتنا. أوجاعك اللي اشتريت 
فيها كرامة الإنسان، والإنساناللي عم يلتهي يشتري تياب وبيوت وأراضي وسيارات
ومجوهرات وإشيا كتيرة ما بيقدر بأثمانها كلها يشتري شبر واحد من ملكوتك البعيد. 
نعم يا رب ملكوتك كتير بعيد ونحنا كتير غرباء عن مملكة السما. نحنا يا رب إذا 
حبّينا منحبّ بأنانيّتنا، إذا كرهنا منستجمع كره جهنّم معنا، وإذا غضبنا منكسر 
طراوة هالقلب الرقيق ومنعمل منّو حجر نراشق فيه إخوتنا.

نعم يا رب، ملكوتك بعيد بعيد ونحنا كل يوم عم نبعد أكتر! حتى بمرضنا لمّا منندهلك 
منفتكر إنو إلنا حقوق عليك وإنّك مجبور تشفينا، كأنّا شي لعبة مكسورة ولازم 
تصلّحها بأعجوبة، ومننسى إنو هالدني كلها مشوار قصير، ما بتحرز نركّز إذا 
هالجسد عليل أو صحيح، لأنه كم فشخة وبيخلص المشوار، منلتقي فيك وما بيعود 
ينفع نندم إنو فتّشنا على أمور تانية غير وجّك يا رب..

نحنا حتى بعتمتنا، لمّا منندهلك، منندهلك بخوفنا لأنّو حقيقة عتمتنا بالفعل بتخوِّف، 
ومش لأنّو بدنا ياك، لكن لأنّو خيفانين من عتمة أفكارنا. إصحك شي يوم تصدّق إنّو 
عم نندهلك بدنا ياك إلك وحدك. لأ! نحنا يا رب ما منعرفك ولا منقدر نعرفك لحتى 
نطلبك ونندهلك. ولهلسبب بالذات إنت يا ربّ تجسّدت.

إنت اللي نزلت عن عرشك لأرضنا، جيت تخلّصنا من ذواتنا، لأنّو بداخل كل واحد 

فينا فيه ألف جهنّم وألف شيطان وكلهم بيمونوا علينا، ولهيك إنت جيت. ولهيك رح 

تبقى مصلوب وموجوع وغريب بدنيتنا نحنا البشر، دنيتنا بشعة كتير بشعة يا رب.

حتى الأرض الحلوة وكل مخلوقاتها اللي هديتنا ياهم، خرّبناهم وقتلناهم يا رب 
وصرنا ناكل كل الحيوانات وحلّلنا هالمخلوقات البريئة شي للأكل وشي لرفقتنا 
بالبيوت وشي للبراري وشي للمزارع وكلّ منّا عم نبعد عنّك ومش فهمانين شي!

سامحني لمّا بقلّك مع آلامك، أنا ما بستحقّ ربع جلدة متل اللي انجلدتهم كرمالي 
يا يسوع، ويا ريت شي يوم بشي نهار،  حدا يفهم سرّ آلامك ويقوم معك متل 
هالقديسين اللي سبقونا.

أسجد لآلامك أيها المسيح وأنحني أمام جبروتك بثقل خطاياي.
ربيعة طوق