إلى عطر دم مالك وهيثم

بشري صرتي الحزن الما بيتعزّا!!

إبليس من دم رجالك مبارح تغدّى،

وبيعرف منيح مملكة السما إنتي خدّا،

وبيعرف عالأرض فرسان السما حَدّا.

لكن صابيع الشرّ كتيرة ما قْدِرْنا نْعِدّا،

نحنا اللي صابيعنا بالمسبحة بتتهدّا.

مَندورة عيالنا، ارزاقنا وأرضنا لأمنا العذرا، 

هيّي اللي شهدت دم إبنها عالصليب مْنَدّا،

وغير الصلاة والقداسة ببيوتنا وصّتنا ما بدّا.

وشو صعب للعدى ما نوقف ونتصدّى!

والراحوا راحوا اغتيال، مش موت عالهدى! 

يا غَدرة الما حدا قدَّرلها توقيت موعدا!

يا ما صلّينا إيد الشر الله عَنّا يِبعِّدا،

وفي يوم حساب مع رب الكون ونحنا قَدّا؛

مسيحنا اللي بشّر بالغفران بحقّ العِدا،

وقرنة السودا صفحات تاريخنا بِتْشَهِّدا:

سطور محفورة عالريح صوت الريح بيردِّدا،

لا خوف ولا قتل ولا الموت حتى بيهدِّدا!!

وأرز الرب هالشامخ بدم أبطاله صار مَسجِدا،

دعسات جدودنا داير جرودنا مزنّرة تحَدِّدا،

قَدَرْنا نشهد بالدم لدم المسيح يجسِّدا،

واليوم زادت السما قداديس يا ربّي مَجِدا.

ربيعة طوق 

أسجد لآلامك يا ملكي

أنا يا رب، ما إلي عين قلّك مع آلامك. بخجل إشركك بأوجاعي، إنت اللي جيت 
لحتى تنشلنا من ضياع وجع هالأرض. 

أنا يا يسوعي بستحي لما كتير إنوجع، وإغلط وقلّك: مع آلامك يا يسوع، لأنّو آلام 
الإنسان متل هالدنيي، دنيّة، ماإلها علاقة بآلامك السماوية. بخجل منّك يا رب لأنّو 
نحنا البشر آلامنا مربوطة بهالنفس الملهيّة بأمور الأرضيّات: كلسات خواتم برادي 
دواليب تلفزيون إنترنيت تلفون كبايات وقناني وكتير كتير من الأنانيّة، وإنت بكل 
لحظة عم تدفع حقّ أرواحنا من دمّك الربّاني بجسدك الإنساني! شو هالحب 

المعجزة اللي مستحيل نقدر نفهموا، نحنا اللي لابسين تياب الحياة ومشاغلها… 

كيف بدّي إشرك أوجاعي بأوجاعك اللي كانت ثمن حياتنا. أوجاعك اللي اشتريت 
فيها كرامة الإنسان، والإنساناللي عم يلتهي يشتري تياب وبيوت وأراضي وسيارات
ومجوهرات وإشيا كتيرة ما بيقدر بأثمانها كلها يشتري شبر واحد من ملكوتك البعيد. 
نعم يا رب ملكوتك كتير بعيد ونحنا كتير غرباء عن مملكة السما. نحنا يا رب إذا 
حبّينا منحبّ بأنانيّتنا، إذا كرهنا منستجمع كره جهنّم معنا، وإذا غضبنا منكسر 
طراوة هالقلب الرقيق ومنعمل منّو حجر نراشق فيه إخوتنا.

نعم يا رب، ملكوتك بعيد بعيد ونحنا كل يوم عم نبعد أكتر! حتى بمرضنا لمّا منندهلك 
منفتكر إنو إلنا حقوق عليك وإنّك مجبور تشفينا، كأنّا شي لعبة مكسورة ولازم 
تصلّحها بأعجوبة، ومننسى إنو هالدني كلها مشوار قصير، ما بتحرز نركّز إذا 
هالجسد عليل أو صحيح، لأنه كم فشخة وبيخلص المشوار، منلتقي فيك وما بيعود 
ينفع نندم إنو فتّشنا على أمور تانية غير وجّك يا رب..

نحنا حتى بعتمتنا، لمّا منندهلك، منندهلك بخوفنا لأنّو حقيقة عتمتنا بالفعل بتخوِّف، 
ومش لأنّو بدنا ياك، لكن لأنّو خيفانين من عتمة أفكارنا. إصحك شي يوم تصدّق إنّو 
عم نندهلك بدنا ياك إلك وحدك. لأ! نحنا يا رب ما منعرفك ولا منقدر نعرفك لحتى 
نطلبك ونندهلك. ولهلسبب بالذات إنت يا ربّ تجسّدت.

إنت اللي نزلت عن عرشك لأرضنا، جيت تخلّصنا من ذواتنا، لأنّو بداخل كل واحد 

فينا فيه ألف جهنّم وألف شيطان وكلهم بيمونوا علينا، ولهيك إنت جيت. ولهيك رح 

تبقى مصلوب وموجوع وغريب بدنيتنا نحنا البشر، دنيتنا بشعة كتير بشعة يا رب.

حتى الأرض الحلوة وكل مخلوقاتها اللي هديتنا ياهم، خرّبناهم وقتلناهم يا رب 
وصرنا ناكل كل الحيوانات وحلّلنا هالمخلوقات البريئة شي للأكل وشي لرفقتنا 
بالبيوت وشي للبراري وشي للمزارع وكلّ منّا عم نبعد عنّك ومش فهمانين شي!

سامحني لمّا بقلّك مع آلامك، أنا ما بستحقّ ربع جلدة متل اللي انجلدتهم كرمالي 
يا يسوع، ويا ريت شي يوم بشي نهار،  حدا يفهم سرّ آلامك ويقوم معك متل 
هالقديسين اللي سبقونا.

أسجد لآلامك أيها المسيح وأنحني أمام جبروتك بثقل خطاياي.
ربيعة طوق 

بَوح

 هرمتُ فجأةً وكسرتني كلّ هزائم العمر يا أبي يومَ رحلتَ برفقة الطفلة التي كانت 

تسكنني، وحللتُ أنا مكانها برفقة موتك وجهاً لوجه! ومرعبٌ هذا اللقاء بين المرأة 

التي أنا عليها اليوم بمواجهة موتك. 

كيف تواجه امراةٌ مثلي موت أبيها؟ موتك صفعني وجعلني أنتبه إلى أني لم أعد 

تلك الطفلة التي تكافح بك كلّ معارك الحياة، منتصرةً هانئةً وآمنة. لا! 

موتك خسّرني دفاعاتي وهزم جبروت قوتي، أنا مَن كنتُ لا أتعب ولا يهزمني صعبٌ! 

موتك الرصاصة الأخيرة في مسدسي، وهي التي قتَلَتني.

أضعتُ يا أبي يُمْنَتي مِن يَساريْ

واحتارتْ بي الخطوات في مَساريْ

كَمْ يا أبي تَوَسَّلتُ ربَّ الأعمارِ

ليمنحكَ ما لديه من الأقدارِ

وطالت بنا سبحةُ الإنتظارِ

بين رفوف الصلوات ليل نهارِ

كنتُ معك أحضّر على العمر انتصاري 

على رحلات الوقوع ثم الوقوف دون انكسارِ

لكنّه اختاركَ لصلبانٍ وفي قلبي أضرم ناري

احترقت بنا وانتهينا رماداً في الدارِ

وحده شجر عينيكَ يبقى دائم الإخضرارِ

وأنا هرمتُ فجأةً وابتلعني العمر كالإعصارِ

ربيعة طوق 

ماما وأصابع الله

 

كبرت يا ماما وصرت عم إشبهك. كبرت يا ماما وصرت عم إفهم ليش كنتي تاكلي فضلات الأكل البايت. فهمت إصرارك على أكلهم بالوقت اللي نحنا نكون عم ناكل الطبخ الطازة. مش لأنه في قلّة! لأ! ربّنا كتير كريم ومبحبح الخير على طاولتنا. فهمت كمية الجهد اللي كنتي تبذليه فوق طاقتك، لحتى تحضّري الطبخة بالرغم من عجزك بسبب كتر الشغل وكيف بتحرصي تحطي مكونات قلبك بكل ورقة بقدونس عم تغسليها وتنشفيها وتفرميها بإيديكي التعبانين. وياي شو إيديكي مقدسين! معك حق يا ماما! معيار الأكل مش بس بيشترط يكون طازة لحتى يغذي! بتبقى كل خواصه الغذائية موجودة بوفرة، من كتر ما عطيتيه طاقة فوق التعب وأكبر من الجهد؛ إرادة الحب الما إلو شروط. قلبك هوّي الطبّاخ البيحضر الأكل للناس البيحبهم، وبيبحبح عيار الإهتمام بسعادتهم وراحتهم حتى لما يرجعوا عالبيت المسا بعد نهار شغل طويل، يلاقوا السفرة محضرة وإنتي ناطرتيهم بلا ما تاكلي، ليرجعوا ياكلوا من إيديكي طازة. 

كنا يا أمي ناكل الطبخة الطازة وإنتي تاكلي الأكل مسخّن من البراد مع فتافيت الخبز. كل ما إتذكّر بيتفتفت قلبي وبخجل من حبك الكبير اللي كنتي تسكبيه بكل شي كنتي تعمليه. تحرمي حالك من أكلة صرفتي عليها كل النهار لحضّرتيها، بلكي شهيّتنا استدعت ناكلها كلّها، وتخافي هالحصة اللي رح تسكبيها بصحنك، تخافي ما تكوني من حصّتنا عم تاخديها! ماما إنتي حصّة القلب ومحصلة حب الله الصافي، وياي قديش بتحبنا يا الله، لحتى سكبت حالك بأمي!

ربيعة طوق

اللعبة

 

بين الحمل والولادة، علبة الرحم..

بين الطفل واللعب، علبة الهدية..

بين العتمة والنور، علبة النظر..

بين الموت والقبر، علبة النعش.. 

بين الأخ والأخت، علبة الوحدة..

بين العاشق والعاشقة، علبة الخاتم..

بين الصديق والصديقة، علبة الأسرار..

بين التشرد والإستقرار، علبة المنزل..

بين الأحداث والحنين، علبة الذكريات..

بين النعاس والنوم، علبة الأرق..

بين النوم والغفوة، علبة الأحلام..

بين الأحلام والحقيقة، علبة الخيبات..

بين يدين الحياة نحن العلب.. 

الحياة بنا تلعب..

لا تتعب..

لا تعتب..

إلعب.. العلبة هي اللعبة.. 

إلعب قبل أن تدخل عتم العلبة..

ربيعة طوق