Saturday, September 28, 2019

وجعك يا بيّي أصعب عذاب


أصعب عذاب
لما تشوف ال بتحبّهم عم يتعذبوا حدّك
ومش قادر تاخوذ عنّهم أوجاعهم..
بتحس إنّو روحك عم تنجلد
وإنو عقارب الدنيي كلّها عم تشلّع جلدك..
وشو صعب يا ربّي يكون هالشخص بيّك! سبب وجودك بها الحياة،
عم يتألم وإنت مش قادر تعمل شي!!!
عاجز بتوقف قدام الوجع
قدام الدمعة العم تخنقك وما بدك تبكيها قدامو 
وبتصير تكويك إنت وعم تجرّب تدوّبها بصوتك 
العم يرجف متل ورقة بريح كانون..

وبتوقف عالباب،
تخبّي دموعك لما تشوفهم عيون الأحباب، 
بتتمنّى ياخذك شي غياب،
أو تصرّخ بوجّ العمر: كذّاب إنت كذّاب!
هالقهر كلّو ما كان بالحساب، 
ولا قرينا متلو بكتاب،
إلّا سفر أيوب وبيذهلك بإعجاب!
احتلّو المرض بعمر الشباب،
هالبيّ الما عاد في لجسمو ثياب،
ومتبسّم رغم كتر المصاب
روح جبّارة ما صابا اكتئاب.

وشو تسكّر بقلبي يا بيّي بواب،
عا عمر قاسي بيطيّر عقل وصواب،
عايش بغربة المرض وبالغربة قلال الحباب!
جبّار بسريرك مارد من قداسة واهتياب.

عم يكبر بقلبي الصمت ووهن السراب
قالوا يوم إلك ويوم عليك؛ يعني دولاب..
لكن طلع ما في عدالة بالدني ولا في ثواب
من كتر الوجع صارت إرهاب
فيها العذاب كبير وللعذاب ما في جواب...

Wednesday, August 21, 2019

ملؤ الصفحات صفعات


لسنا جميعاً صفحاتٍ بيضاء؛ نحن مجموعة ما بقي بعد صفعات الأيام، وبقايا ممّا كنّا 
نظنّه أنفسنا. أكثرنا مكسور الأنصاف، أو مبتور الأحلام..... أكثرنا صفحاتٌ ملؤها 
أسطر لا يُفهم الكثير من محتواها لكثرة ما أمطرت الدمعات فوق الأحرف، نقاطاً، 
وحدها كان له الحصّة الأكبر فوق صفحات أيامنا، كما فوق صفحات وجناتنا.....

لذا، تذكّر، حين تدخل صفحة شخصٍ ما، أنه على غرارك، قد تحمّل العديد من 
الصفعات ولا يزال لديه عددٌ من الصفحات؛ فاجعل من قلمك حبراً  يُدخل الدّافىء من 
المعاني بين الأسطر. والأهمّ أن تتذكّر أنه لا يحقّ لك الكتابة على صفحات حياة الآخرين، بل أنيتماشى سلّم قِيَمك مع منظومة قِيَم الآخر، كي لا تخمش زجاج العاطفة. 
فللعاطفة كرامةٌ لها الشأن الأعلى في قمم الكيان. 

Sunday, June 9, 2019

حدّ العمر سواءْ


ما أعطيناه القلبُ مكانا،
كانت الليالي أثقل من أن يحملها حبل الأمان
وعواطف هوجاء كعواصف الشتاء،
تمزّق فساتين الأفراح المنتظرة تحت عناق الغضب
..
عودي!عودي يا فتاتي إلى مكانك
فالوجوه الأخرى كلّها سواءْ
واعذري من لكِ أساءْ
فالناس يسكنها الهباءْ..
لاتحزني على ما فات
لاتحزني فالعمركلّه فات..

Friday, May 3, 2019

شو بحب حِبَّك


شو بحبّ حِبَّك متل الغيم
لِم ينزل بالسما تلوين
أبيض أبيض جناحاتو حلوين
ماسك بقلبو الشتي
وناطر وجّك يطلّ ليغمرو
ويفرشلو  السما دقات القلب 
والعوا عم يعزف وراقو الريح
بغصونو معشّشة رنّات الذهب
وتلوّح فراشات الزهر بإديك الممدودين
عاحلم بيشبه دفا عينيك
البيخاف منّا البرد
وبيسأل عنها الورد...
قلّها قلّها بعد
عن شتي ما فيه رعد
عن عمر غالي فيه الوعد
قلّها قلّها بعد
صوتك بقلبها بيسكُب سَعد.

شو بحبّ حبَّك متل الغيم
ضايع بحالو ومكتفي
أرضو كلّ الدني
وبعبّو فصول السني 
والسنة ورقة بغصن الضجر
والقمر ناطر يتفيّا بقلب الشجر
ناطر يصير متلك بشر
ليعشقك ويحنّ لجنونو الحجر
هيدي حكاية حب الأرض للقمر
حكاية المستحيل الما إلو مطرح بالدني
لكن رافض للحقيقة المرة ينحني.

Wednesday, January 23, 2019

قهّار يا موت


يا موت يا قهّار!
شو مسلّطك عالولاد الزّغار؟؟
ما عادْ تِشْبْعَكْ موتة الختيار!؟
لَصِرت تنقّيهون طفال بلا أعمار،
طرايا متل زهور الجلّنار..
بَعدْهُنْ بالفعل وبالنوايا أطهار
بحياتْهُنْ بعد ما ابتدى المشوار !
موتْهُنْ بيطعن قلوب الأهل بسيف نار،
وما بيتركلهُن من الحياة إلّا قهر وشحّار

يا موت يا قهّار!
شو مسلّطك عالولاد الزّغار؟؟
صاير وحش عم ياكول ليل نهار
بعلمي بتنطر هالجسم لَيِنهار
لَتِنْهَشْ عمر وذكريات كتار؛
لكن شو ذنبهُنْ طفال ما عِنْدْهُنْ بَعدْ اسرار،
ولا لحقوا يدوقوا طعم العمر أو معنى القرار!
بعدها صورة الأول قربانة هيّي صَدْرْ الدار
سْرَقتهُنْ من صور الحب والرقص بلا أعذار!!!!

شو ذنب الأم تذبحها بخبار
ناطرة إبنا يحيكلها شو صار!
ما لِحْقِت داقت طعم الأمومة والأنوار،
إلا وطعنتها بعمر الحلم يا غدّار!
وتركتها بصمت الصلاة مقطوش الحوار:
ربّ السما اللي عطاها يَتَّما! شو هالإنفجار!؟!

حيّرت الدني يا موت ووحدك ما بتحتار
والهيئة وحدك إنت عم تعرف تختار!!!!!