ناقص الحساب

 سنة ورا سنة، من عمرنا بتكبر وبتروح..

سكاكين الوقت عم تنحت فينا الروح..

عيون بتخيّط رموشها صلاة للغياب،

والوقت نازل باعمارنا خبيط عا البواب. 

وما بتوقف عقارب الساعة تودّع معنا احباب

صواتن لَوْ غابوا، محفورة فوق عيوننا حجاب.

وتحترق ايدينا مسابح يا وقت وقاف ما تروح! 

بسّ الموت أخرس وبسرّ اللي راحوا ما بيبوح.

وتبقى شمعة رغبة منسيّة فوق السحاب،

بِقْيِتْ بعيونا الدني دنية أمل رغم العذاب،

تفكفك حروف الكلام من هالكتاب المفتوح،

عا صليب خشباتو محفورة بصوت مبحوح..

والسرّ وراه السرّ مدفوع حقّو سنين الشباب،

وما في عمر كافي لنفهم دنية عقاب وثواب.. 

وشو العطر اللي منلبسو غير الحنين البيفوح،

من مناسبات حضّرناها سرقة بوقت مشلوح

من نبض جلدنا، لنبض همسنا بخلايا تياب،

بالدور روح تفارق روح لدنية الحق والحساب 

هونيك، بهاك الدني، الوقت مش مسموح؛

حساباتنا مجموعها بالآخر من عمرنا مطروح.

٢٠٢٤/١٢/٣١

ربيعة طوق

مريم يا أمي

 

مريمُ يا أمي،

أنتِ أجمل كلمة على فمي،

يا مَن أعطيتِ القيمة لِدَمي

ولكلّ امرأةٍ بك تتمثّلُ وتحتمي..

مريمُ يا أمي،

منك أَسْتَقي نِعَمي،

فيُزهر عُمري بالنّغَمِ.

مريمُ يا أمي،

كلّ ما دونك مَحْضُ وَهَمِ..

كطفلةٍ، قوديني مِن مِعصَمي

وابقي دوماً وِجهتي ومَعْلَمي.

أمي، بين تلك النَّعَمِ

التي حمَّلتها للملاك المُكرَّمِ،

وبين أمي التي وَلَدَتْني للعالمِ

تتجلّى عظمة الإله الأكرمِ

بِخَلْقِه للأمومة دواءً ضدّ الألمِ…

ربيعة طوق

٢٠٢٤/٠٥/٠١

اليوم شفت الأرزة مكسورة بتابوت

 البطل ما بيموت

لا تسألوا كيف البطل بيموت!

ولا سرّ البطولة إذا بالدم مَوروت؛

حقّ الوطن عهد مقدّس منحوت،

فداه الدم كل نقطة حجر ياقوت!

باسكال البَيّ بقلبو قداسة الملكوت،

قدّام الموت طلب أبوّتو بكلّ جبروت! 

لكن الشرّ حابك خيوطو متل عنكبوت،

ناطر يتصيّد غدر! جبان نذل عكروت!

والعدالة مخطوفة بالعها التنّين الحوت،

داير بالوطن بهجّر ويسكّر للأوادم بيوت..

اليوم الجنّاز عرس البطولة بكنيسة بيروت،

حتى لو ما كنت تعرفو قبل اغتيالو الموقوت،

باسكال من الناس اللي بعد موتها عالقلب بتفوت.

اليوم حقّك علينا كل الدموع ولا للسكوت!

كلّ عمرها الأرزة بتلفّ بغصونها التابوت،

اليوم شفت الأرزة مكسورة بقلب التابوت.

ربيعة طوق

٢٠٢٤/٠٤/١٢

أهل المعمودية أهل المعصية

 يا إسرائيل ويا فلسطين ما هذه البليّة؟

بين أطفال الحجارة وأطفال التراب بندقية!

يزعمون بأن الله هو السبب بل وهو القضية،

ونحن نشاهد، نتمزّق، نذرف الدموع الفضيّة

كيف متى ولمَ، مزّقنا وَسَحقنا دين الإنسانية؟

دين الولادة والموت وسلم الحياة الطبيعيّة،

فجميعنا إلى الفناء وللأرض وحدها البقيّة،

ما هزّنا تاريخ النزاعات والحروب الدمويّة،

ولا ارتوينا من قتل الأبرياء حسب الهويّة،

بل أمعنّا في اختراع وسائل إبادة جماعيّة،

وامتهنّا كل أشكال القتل نفتخر بها علانيّة،

نملك كل أنواع الأسلحة والمواد الكيماويّة،

ونفتقر إلى أدنى صفات الرحمة السماوية،

حتى الوحوش تتبادل بينها القليل من الوديّة،

فشلت الشياطين بمحاكاة معاصينا اليوميّة،

الأكثرية صامتة صمتها شريك في المعصية،

والسماء سحبت غطاءها تبحث عن تعزية،

واستقالت من ادّعاءاتنا بأننا أبناء الألوهية!

وحدها الحجارة في هذه الأرض لها الأحقيّة.

ربيعة طوق 

وصيّتي

يا بِكي بيكفي بقا تذرف دموع!

هالقلب يا ما ضوّا صابيعو شموع،

والوقت وحدو رفيق عالدرب طلوع،

ماشي والإيام مسبحة ما فيها رجوع..

هالدمعة، اتركها جوّا العين ترتاح!

ما فيك من الدني تلغي الهموم،

وجودها بيرسم سما متل الغيوم،

ومتل كل شي بهالدني؛ ما فيها شي بيدوم..

عيش العمر لحظة بلحظة طفل جديد،

بقلب كلّ لحظة في شي حلو عالأكيد،

حتى الحزن استقبلو بفرح متل العيد،

واتروك الله يشتغل؛ اسمحلو يمسكك بالإيد!

هالعمر هديّة، يعني مرّة العطيّة!

والعرض مباشر مش مسرحيّة،

لا تضيّع وقتك بأمور بلا أهميّة؛

حبّ الدني بلا حدود وبلا منيّة.

السرّ إنّو ما في سرّ..

في قلب، وفي دقّة

وفي إنت وفي أنا

وكلّنا للعمر زوّار

وبدّو يخلص المشوار 

عيشو! هيدا الإنتصار.

ربيعة طوق

٢٠٢٤/٠٣/٢٠